Familja Kaçi ka marrë urdhër mbrojtje nga gjykata, pasi u dhunuan nga ish-gardisti Martin Nikolli dhe të afërm të tij pak ditë më parë në Hamallaj të Durrësit.
Kujtojmë se konflikti mes dy familjeje lindi për shkaqe pronësie, teksa ish-gardisti, i shkarkuar dhe i arrestuar tashmë, u përfshi në konfliktin dhe qëlloi me armën e shërbimit.
Në dhunën e ushtruar ndaj familjes Kaçi në Hamallaj të Durrësit është përfshirë dhe punonjësi i gardës Martin Nikolli, i cili me detyrë dyshohet se është shofer i kryeparlamentares Lindita Nikolla.
Konfirmimi për përfshirjen në konflikt të punonjësit të gardës bëhet nga vetë Policia, në një reagim zyrtar për ngjarjen. Faxweb.al ishte ndër të parët që transmetoi lajmin e përfshirjes së punonjësit të gardës në këtë konflikt, që çoi në disa persona të lënduar në radhët e familjes Kaçi.
Policia ka shoqëruar disa persona, dhe po vijon puna për zbardhjen dhe dokumentimin e plotë të rrethanave të konfliktit.
Si pasojë e dhunës janë plagosur 3 djemtë e familjes Kaçi, njëri prej të cilëve në kokë, ndërsa dy të tjerët janë në gjendje më të mirë. Pre e dhunës kanë rënë dhe gra e fëmijë.